INNHALD

Forord

Etter nyttår 2000 har Sagvåg skule nytta ein del fellestid til å drøfta arbeidet med vurdering ved skulen vår. Arbeidet har resultert i denne planen for det vidare arbeidet. Planen har to delar: A) Skulevurdering og B) Elevvurdering.
Dette skrivet må også sjåast i samanheng med planen for "Kvalitetsutvikling ved Sagvåg skule 2000-2003"

Lars Bakka
-rektor-

Bakgrunn

Kravet til vurdering i norsk grunnskule vert omtala i ei rekkje dokument, m.a. forskrifta til opplæringslova:

§ 2-1 Skole- og lærebedriftsbasert vurdering
 Skolen og lærebedrifta skal jamleg vurdere i kva grad organiseringa, tilrettelegginga og gjennomføringa av opplæringa medverkar til å nå dei mål som er fastsette i den generelle delen av læreplanen og dei enkelte læreplanane for fag.
  Kommunen og fylkeskommunen har ansvar for å sjå til at vurderinga blir gjennomført etter føresetnadene.

§ 3-1 Rett til vurdering
[......]
Det skal leggjast vekt på å gi god tilbakemelding og rettleiing til elevane med sikte på å fremje læring og utvikling. Det skal også leggjast til rette for at elevane kan gjere god eigenvurdering.
  § 3-3 Vurderingsformer
På barnesteget skal skolen berre nytte vurdering utan karakterar.  

Avklaring av nokre omgrep

Skulebasert vurdering  

Skulebasert vurdering er den interne vurderinga av praksis og måloppnåing i skulen. Skuleeigaren har ansvaret for at skulane vurderer i kor stor grad den organiseringa, tilrettelegginga, gjennomføringa og vurderinga av opplæringa som skulen utfører, medverkar til å nå dei måla som er sette for opplæringa.
 Gjennom systematisk og kontinuerleg skulebasert vurdering kan skulen utvikle og forbetre sin pedagogiske praksis.
 Leiinga ved skulen har ansvaret for å gjennomføre den skulebaserte vurderinga. 

(Kjelde: KUF)

Skulevurdering

Skulevurdering er ei vurdering av heile verksemda til skulen. Ho kan vera skulebasert, men ein kan også nytta eksterne krefter for å få utført ei slik vurdering.

Elevvurdering

Vurdering av eleven sitt arbeid og utvikling kan vera intern og vert då utført av eleven sjølv, læraren og foreldra. Døme på ekstern elevvurdering kan vera eksamen i ungdomssteget med ekstern sensor, men og vurdering av t.d. trivsel (t.d. Dei undersøkingane "Senter for  adferdsforskning" har gjort ved skulen.) Det er også eit mål at elevvurderinga skal integrerast i den skulebaserte vurderinga.

Kva skal ein vurdera?

Her er det fleire svar. For det første har sjølvsagt elevvurderinga ein sentral plass, men også sjølve skulen må vurderast gjennom skulevurdering.

Ein må vurdera :

• arbeidet til skuleleiinga

• arbeidet til lærarane

• klassane

• heimen si rolle skulearbeidet

• samarbeidet mellom alle aktørane.

Det vert viktig å kartlegga kriteria for vurdering.

Kven skal vurdera?

Alle aktørane i skulen må ta del i elevvurderinga; elevane, dei tilsette, leiinga og foreldra.

Men kven skal vurdera skulen si verksemd ?-  Foreldregruppa vil framstå som ei "ekstern" vurderingsgruppe, men det er likevel interessant å still spørsmålet om ikkje skulen kan ha godt av ei ekstern vurdering. Då kan det koma inn folk som systematisk kan vurdera heile verksemda.

Vurdering i utviklingsprosessane ved skulen